പ്രിയ സുഹൃത്തേ, ഇന്ന് നമുക്ക് സങ്കീർത്തനം 92:12 ധ്യാനിക്കാം. കർത്താവ് നമുക്ക് നൽകുന്ന മനോഹരമായ ഒരു വാഗ്‌ദത്തമാണിത്, അത് ഇപ്രകാരം പറയുന്നു, “നീതിമാൻ പനപോലെ തഴെക്കും; ലെബാനോനിലെ ദേവദാരുപോലെ വളരും.” നിങ്ങൾ അവനിൽ വളരണമെന്ന് ദൈവം എപ്പോഴും ആഗ്രഹിക്കുന്നു. ഇവിടെ, സങ്കീർത്തനക്കാരൻ ഒരു നീതിമാനായ വ്യക്തിയെ പനയ്ക്കും ദേവദാരു മരത്തിനും സമാനമാണെന്ന് വിവരിക്കുന്നു. എപ്പോഴാണ് ഇത് സംഭവിക്കുന്നത്? നീതിസൂര്യനായ ക്രിസ്തു നിങ്ങളുടെയും എന്റെയും മേൽ പ്രകാശിക്കുമ്പോഴാണ് ഇത് സംഭവിക്കുന്നത്, നാം അവനിൽ തഴച്ചുവളരുകയും പെരുകുകയും ചെയ്യുന്നു. ഒരു പനയെ നോക്കൂ. അത് എല്ലായ്പ്പോഴും ധാരാളം ഉപയോഗപ്രദമായ കാര്യങ്ങൾ നൽകുന്നു, അതിശയകരമാംവിധം മനോഹരവുമാണ്. ഉത്തമഗീതത്തിൽ, ശലോമോൻ പറഞ്ഞു, “നിന്റെ ശരീരാകൃതി ഒരു പനപോലെയാണ്.” പലതരം പനകളുണ്ട്. ഇസ്രായേലിലെ വഴിയോരങ്ങളിൽ ഈന്തപ്പനകൾ നട്ടുപിടിപ്പിക്കുന്നു. അവ വളരെ മനോഹരമായി കാണപ്പെടുന്നു. അവയുടെ പഴങ്ങൾ, മധുരമുള്ള ഈത്തപ്പഴങ്ങൾ, വഴിയരികിൽ വീഴുന്നു, നാം കടന്നുപോകുമ്പോൾ, അവ പെറുക്കി തിന്നുന്നു. ഈത്തപ്പഴം ആകർഷകം മാത്രമല്ല, അർത്ഥവത്തായതുമാണ്. 

അതുകൊണ്ടാണ് 1 രാജാക്കന്മാർ 6:29-ൽ രേഖപ്പെടുത്തിയിരിക്കുന്നതുപോലെ, ശലോമോൻ രാജാവ് അന്തരാലയവും ബഹിരാലയവുമായ ആലയത്തിന്റെ ചുവരുകളിലെല്ലാം ചുറ്റും ഈന്തപ്പനയുടെ രൂപം കൊത്തി ഉണ്ടാക്കിയിരിക്കുന്നത്. ഈ മരങ്ങൾ സമ്പത്തിനെ സൂചിപ്പിക്കുന്നു. അവ പഴങ്ങൾ, നാരുകൾ, നിർമ്മാണ സാമഗ്രികൾ, മരുന്നുകൾ, മറ്റ് നിരവധി ഉപയോഗപ്രദമായ വസ്തുക്കൾ എന്നിവ നൽകുന്നു. ഇന്നും, യേശുക്രിസ്തുവിന്റെ വിജയകരമായ പ്രവേശനത്തെ ആഘോഷിക്കുന്ന കുരുത്തോല ഞായറാഴ്ചയിൽ, ശത്രുക്കൾക്കെതിരായ വിജയത്തിന്റെ പ്രതീകമായി ക്രിസ്ത്യാനികൾ പനയുടെ ശാഖകൾ ഉപയോഗിക്കുന്നു. അതുകൊണ്ട്, "നീ ഒരു പനപോലെ തഴച്ചുവളരും" എന്ന് കർത്താവ് പറയുമ്പോൾ, അത് സൗന്ദര്യത്തിന്റെയും ഫലഭൂയിഷ്ഠതയുടെയും വിജയത്തിന്റെയും വാഗ്ദാനമാണ്.

ഇനി, ഒരു ദേവദാരു മരത്തിന്റെ പ്രാധാന്യം എന്താണ്? അതിന്റെ വേരുകൾ ആഴത്തിൽ വളരുന്നു, 50 അടി വരെ വീതിയിൽ വ്യാപിക്കാൻ ഇത് പ്രാപ്തമാക്കുന്നു. ഇത് 120 അടി വരെ ഉയരത്തിൽ വളരുന്നു. ഇത് ഉയരമുള്ളതും ശക്തവും ഗാംഭീര്യമുള്ളതുമാണ്. അതുകൊണ്ടാണ് ഇതിനെ വൃക്ഷങ്ങളുടെ രാജാവ് എന്ന് വിളിക്കുന്നത്. ദൈവത്തിന്റെ ഒരു പൈതൽ എന്ന നിലയിൽ, ദൈവത്തിന്റെ സത്യത്തിൽ വേരൂന്നിയ ഈ വൃക്ഷത്തോട് നിങ്ങളെ ഉപമിച്ചിരിക്കുന്നു. അതുകൊണ്ടാണ് യെശയ്യാവ് 65:22-ൽ കർത്താവ് പറയുന്നത്, “എന്റെ ജനത്തിന്റെ ആയുസ്സു വൃക്ഷത്തിന്റെ ആയുസ്സുപോലെ ആകും.” ദേവദാരു മരങ്ങൾ ആയിരത്തിലധികം വർഷങ്ങൾ ജീവിക്കുന്നു. അവ ദീർഘകാലം നിലനിൽക്കുന്നതും സമൃദ്ധിയുള്ളതുമാണ്. അതുകൊണ്ടാണ് കർത്താവ് നിങ്ങൾക്ക് വാഗ്ദാനം ചെയ്യുന്നത്, “നിങ്ങൾ ഒരു പനയും ഒരു ദേവദാരുവും പോലെയാകും.” ഈ ശക്തമായ വൃക്ഷങ്ങളെപ്പോലെ കർത്താവ് നിങ്ങളെയും തഴച്ചുവളരാൻ ഇടയാക്കട്ടെ.

PRAYER:
പ്രിയ സ്വർഗ്ഗീയ പിതാവേ, സങ്കീർത്തനം 92:12 ലെ അങ്ങയുടെ സ്നേഹനിർഭരമായ വാഗ്‌ദത്തത്തിന് നന്ദി. സൗന്ദര്യവും ഉപയോഗക്ഷമതയും വിജയവും നിറഞ്ഞ പന പോലെ തഴച്ചുവളരാൻ ഞാൻ ആഗ്രഹിക്കുന്നു. എന്റെ ജീവിതം എല്ലാ കാലത്തും ഫലം കായ്ക്കുകയും അനേകർക്ക് അനുഗ്രഹമായിത്തീരുകയും ചെയ്യട്ടെ. കർത്താവേ, ദേവദാരു വൃക്ഷം പോലെ എന്നെ ആഴത്തിൽ വേരൂന്നണമേ. എന്റെ വിശ്വാസം അങ്ങിൽ ശക്തമായി വളരട്ടെ, ഇളകാത്തതും അങ്ങയുടെ സത്യത്താൽ സമ്പന്നവുമായി വളരട്ടെ. യേശുവേ, നീതിസൂര്യനെപ്പോലെ എന്റെ മേൽ പ്രകാശിക്കണമേ. അങ്ങയുടെ കൃപയിൽ ഉയർന്നു നിൽക്കാനും, അങ്ങയുടെ സ്നേഹത്തിൽ അഭിവൃദ്ധി പ്രാപിക്കാനും, അങ്ങിൽ ദീർഘവും അർത്ഥവത്തായതുമായ ജീവിതം നയിക്കാനും എന്നെ പ്രാപ്തയാക്കണമേ. യേശുവിന്റെ നാമത്തിൽ, ഞാൻ പ്രാർത്ഥിക്കുന്നു, ആമേൻ.