എന്റെ പ്രിയ സുഹൃത്തേ, നിങ്ങൾക്ക് വന്ദനം പറയുന്നത് വളരെ സന്തോഷകരമാണ്. കർത്താവിലുള്ള നമ്മുടെ പ്രത്യാശ ഒരിക്കലും പരാജയപ്പെടുകയില്ല. നാം അവനിൽ ആശ്രയിക്കുമ്പോൾ, അത് കർത്താവിനെ നമ്മുടെ ഉള്ളിൽ കൊണ്ടുവരികയും അവന്റെ അനുഗ്രഹം നമ്മുടെ ജീവിതത്തിൽ പ്രകാശിപ്പിക്കുകയും ചെയ്യുന്നു. സങ്കീർത്തനം 1:3-ൽ പറയുന്നതുപോലെ, യഹോവയുടെ ന്യായപ്രമാണത്തിൽ സന്തോഷിച്ചു അവന്റെ ന്യായപ്രമാണത്തെ രാപ്പകൽ ധ്യാനിക്കുന്നവൻ, "ആറ്റരികത്തു നട്ടിരിക്കുന്നതും തക്കകാലത്തു ഫലം കായ്ക്കുന്നതും ഇലവാടാത്തതുമായ വൃക്ഷംപോലെ ഇരിക്കും." ഒഴുകുന്ന വെള്ളത്തിനരികിൽ നട്ടുപിടിപ്പിച്ച മരങ്ങളെ നോക്കൂ; അവ നന്നായി പോഷിപ്പിക്കപ്പെടുന്നു, അവയ്ക്ക് ആവശ്യമുള്ളത് നിരന്തരം കുടിക്കുന്നു. അവയ്ക്ക് ചുറ്റുമുള്ള മണ്ണ് ഫലഭൂയിഷ്ഠവും പോഷകങ്ങളാൽ സമ്പന്നവുമാണ്. അവ ആരോഗ്യകരവും ആഴത്തിൽ വേരൂന്നിയതുമായതിനാൽ അവ ശരിയായ സമയത്ത് ഫലം പുറപ്പെടുവിക്കുന്നു. അതുപോലെ, കർത്താവ് നിങ്ങളെ ശരിയായ സ്ഥലത്ത് നട്ടുപിടിപ്പിക്കാൻ പോകുന്നു.

ദൈവവചനത്തെ ധ്യാനിക്കുന്ന വ്യക്തി അത്തരമൊരു വൃക്ഷത്തെപ്പോലെയാകുമെന്ന് മുൻ വാക്യം പറയുന്നു. ഇന്ന് മുതൽ ദൈവം തന്റെ വചനത്താൽ നമ്മെ പോഷിപ്പിക്കാൻ പോകുന്നു. ആ വചനം നമ്മെ ആരോഗ്യമുള്ള ഒരു വൃക്ഷമാക്കി മാറ്റും. അത് ജീവൻ നൽകുന്ന വെള്ളം പോലെ നമ്മുടെ ഉള്ളിൽ ഒഴുകുകയും നമ്മുടെ വേരുകളെ ശക്തിപ്പെടുത്തുകയും ജീവിതത്തിന്റെ എല്ലാ മേഖലകളിലും ഫലം ഉൽപാദിപ്പിക്കുകയും ചെയ്യും. നാം തെറ്റായ സ്ഥലത്ത് നട്ടുവെച്ചവരായിരിക്കുകയാണെങ്കിൽ പോലും, അവൻ നമ്മെ അവിടെ വിട്ടുകളയുകയില്ല. അനാരോഗ്യകരമായ മണ്ണിൽ നിന്നും ആത്മീയമായും വൈകാരികമായും ധാർമികമായും നമ്മെ തളർത്തുന്ന സ്ഥലങ്ങളിൽ നിന്നും അവൻ നമ്മെ പിഴുതെടുത്ത്, നമുക്ക് യഥാർത്ഥത്തിൽ തഴച്ചുവളരാൻ കഴിയുന്ന സ്ഥലങ്ങളിൽ അവൻ നമ്മെ പുനർനിർമ്മിക്കുകയും ചെയ്യും.

ഒരിക്കൽ ഒരു വ്യക്തി തൻ്റെ അവസ്ഥ എന്നോട് പങ്കുവെച്ചു. ഒരു കോർപ്പറേറ്റ് ഓഫീസിൽ ജോലി ചെയ്യുമ്പോൾ, തന്റെ വിവാഹജീവിതത്തിന് പുറത്തായി അയാൾ ഒരു തെറ്റായ ബന്ധത്തിൽ പ്രവേശിച്ചു. അത് തനിക്ക് സന്തോഷവും സംതൃപ്തിയും നൽകുമെന്നും, അത് തനിക്ക് ആനന്ദം നൽകുമെന്നും അയാൾ വിശ്വസിച്ചു. എന്നാൽ പകരം, താൻ നിരന്തരം മറഞ്ഞിരിക്കുകയാണെന്നും ഭയത്തോടെയാണ് ജീവിക്കുന്നതെന്നും അയാൾ പറഞ്ഞു. അയാളുടെ പേരിന് കളങ്കം സംഭവിച്ചു, ആ കാലഘട്ടം നരകം പോലെ തോന്നി. യഥാർത്ഥ ആനന്ദം ഉണ്ടായിരുന്നില്ല, അയാൾ പ്രതീക്ഷിച്ചതൊന്നും ലഭിച്ചില്ല. തെറ്റായ സ്വാധീനമുള്ള അത്തരം സ്ഥലങ്ങളിൽ നിന്ന് ദൈവം നമ്മെ പിഴുതെടുക്കാൻ  പോകുന്നു. തന്റെ വചനമാകുന്ന ജീവജലത്തിന്റെ അരുവികളിൽ അവൻ നമ്മെ നട്ടുപിടിപ്പിക്കുകയും ശാശ്വതമായ ഫലം പുറപ്പെടുവിക്കുകയും ചെയ്യും. നമുക്ക് ഈ അനുഗ്രഹം സ്വീകരിക്കാമോ?

PRAYER:
സ്‍നേഹവാനായ കർത്താവേ, എന്റെ പോരാട്ടങ്ങളിൽ ദയവായി എന്നെ സഹായിക്കണമേ. എന്റെ ജീവിതത്തിൽ തെറ്റായ സ്വാധീനങ്ങൾ ഉണ്ടാകുകയും എനിക്ക് നിസ്സഹായത തോന്നുകയും ചെയ്യുന്നിടത്തെല്ലാം, ഇപ്പോൾ, തന്നെ കർത്താവേ, അവയെ അങ്ങ് എടുത്തുകളയണമേ. എന്റെ ജീവിതത്തിൽ നിന്ന് തെറ്റായ കാര്യങ്ങൾ പൂർണ്ണമായും നീക്കേണമേ. തെറ്റായ ആഗ്രഹങ്ങൾ നീക്കേണമേ. ശരിയായ പാതയിൽ നിന്ന് എന്നെ അകറ്റുന്നതെല്ലാം എടുത്തുകളയേണമേ, ഇന്ന് മുതൽ അങ്ങയുടെ വചനത്താൽ എന്നെ അനുഗ്രഹിക്കണമേ. എല്ലാ ദിവസവും രാവിലെ ആവേശത്തോടെ അങ്ങയുടെ വചനം കുടിക്കാൻ എന്നെ സഹായിക്കണമേ. അങ്ങ് എന്നോട് വ്യക്തമായും വ്യക്തിപരമായും സംസാരിക്കുന്നത് ഞാൻ കേൾക്കട്ടെ. അങ്ങയുടെ സന്തോഷത്താൽ എന്നെ നിറയ്ക്കുകയും എന്റെ ജീവിതത്തിന്റെ എല്ലാ മേഖലകളിലും എന്നെ അഭിവൃദ്ധിപ്പെടുത്തുകയും ചെയ്യേണമേ. കർത്താവേ, അങ്ങയുടെ വചനത്തിൽ ആഴമായി വേരൂന്നിയതും ബലമുള്ളതും പോഷിപ്പിക്കപ്പെട്ടതും ജീവനുള്ള അരുവികളിൽ നട്ടുപിടിപ്പിച്ചതുമായ ഒരു ഫലവൃക്ഷമായി എന്നെ മാറ്റണമേ.  യേശുവിന്റെ നാമത്തിൽ ഞാൻ പ്രാർത്ഥിക്കുന്നു, ആമേൻ.