പ്രിയ സുഹൃത്തേ, ഇന്ന് നാം സങ്കീർത്തനം 9:9-ലെ വാക്കുകളിലൂടെ അനുഗ്രഹിക്കപ്പെടാൻ പോകുന്നു. വേദപുസ്തകം ഇപ്രകാരം പറയുന്നു, “യഹോവ പീഡിതന്നു ഒരു അഭയസ്ഥാനം; കഷ്ടകാലത്തു ഒരഭയസ്ഥാനം തന്നേ.” അടുത്ത വാക്യത്തിൽ, അത് മനോഹരമായി സ്ഥിരീകരിക്കുന്നു, "നിന്റെ നാമത്തെ അറിയുന്നവർ നിങ്കൽ ആശ്രയിക്കും; യഹോവേ, നിന്നെ അന്വേഷിക്കുന്നവരെ നീ ഉപേക്ഷിക്കുന്നില്ലല്ലോ." തീർച്ചയായും, കർത്താവിൽ ആശ്രയിക്കുന്നവർ അവൻ്റെ അനുഗ്രഹങ്ങളും പ്രതിഫലങ്ങളും കൊയ്യുന്നു. ദൈവം യഥാർത്ഥത്തിൽ നമ്മുടെ ജീവിതത്തിൽ ഒരു കോട്ടയായി മാറണമെങ്കിൽ, നാം അവൻ്റെ സ്വഭാവഗുണം അറിഞ്ഞിരിക്കണം. അവൻ ആരാണെന്ന് നാം എത്രത്തോളം മനസ്സിലാക്കുന്നുവോ അത്രത്തോളം അവനിലുള്ള നമ്മുടെ വിശ്വാസം ആഴത്തിലാകും.

പ്രശ്നങ്ങൾ നിറഞ്ഞ ഒരു ലോകത്താണ് നാം ജീവിക്കുന്നത്, പലപ്പോഴും ഈ പരീക്ഷണങ്ങളിലൂടെയാണ് നാം ദൈവത്തോട് കൂടുതൽ അടുക്കുന്നത്. ദുഷ്കരമായ ഈ നിമിഷങ്ങളിലാണ് നാം അവനെ കൂടുതൽ അടുത്തറിയുന്നത്. ഉദാഹരണത്തിന് നമുക്ക് ദാവീദിന്റെ ജീവിതം നോക്കാം. ശൗൽ രാജാവ് തൻ്റെ ജീവൻ അപഹരിക്കാൻ അവനെ നിരന്തരം പിന്തുടരുമ്പോൾ പോലും ദാവീദ് ദൈവത്തോട് ചേർന്നുനിന്നു. വേദപുസ്തകത്തിലെ I ശമൂവേൽ 23:14-ൽ ഇപ്രകാരം വിവരിക്കുന്നു, "ദാവീദ് മരുഭൂമിയിലെ ദുർഗ്ഗങ്ങളിൽ താമസിച്ചു. സീഫ് മരുഭൂമയിയിലെ മലനാട്ടിൽ പാർത്തു; ഇക്കാലത്തൊക്കെയും ശൌൽ അവനെ തിരഞ്ഞുകൊണ്ടിരുന്നു; എങ്കിലും ദൈവം അവനെ അവന്റെ കയ്യിൽ ഏല്പിച്ചില്ല." ദാവീദ് ദൈവത്തിൽ ആശ്രയിച്ചിരുന്നതിനാൽ, കർത്താവ് അവനെ ഉപദ്രവത്തിൽ നിന്ന് സംരക്ഷിച്ചുകൊണ്ട് അവന്റെ അഭയസ്ഥാനവും സംരക്ഷണവും ആയി മാറി.

അതുപോലെ, കർത്താവ് നിങ്ങളുടെ അഭയസ്ഥാനവും കോട്ടയും ആയിരിക്കും. എന്നാൽ ദൈവത്തിൻറെ  സ്വഭാവഗുണത്തെക്കുറിച്ച് അജ്ഞരായവർക്ക് സംശയങ്ങൾ നേരിടേണ്ടിവന്നേക്കാം. യോഹന്നാൻ 11-ൽ, യേശു ലാസറിനെ ഉയിർപ്പിക്കാൻ പോയപ്പോൾ, അവന്റെ പ്രിയ സുഹൃത്തായ, ശിഷ്യന്മാരിൽ ഒരാളായ തോമസ് അവനെ സംശയിച്ചു. " നമ്മുടെ സ്നേഹിതനായ ലാസർ നിദ്രകൊള്ളുന്നു; എങ്കിലും ഞാൻ അവനെ ഉണർത്തുവാൻ പോകുന്നു" എന്ന് യേശു പറഞ്ഞിട്ടും, ഭയവും അനിശ്ചിതത്വവും നിറഞ്ഞ തോമസ്, "അവനോടു കൂടെ മരിക്കേണ്ടതിന്നു നാമും പോക" എന്നു പറഞ്ഞു. മുഖ്യപുരോഹിതന്മാരെയും മൂപ്പന്മാരെയും കുറിച്ചുള്ള തോമസിന്റെ ഭയവും യേശുവിന്റെ ശക്തിയെക്കുറിച്ചുള്ള അവബോധക്കുറവും അവനെ സംശയത്തിലാക്കി. എന്നാൽ യേശുവിനെ പൂർണ്ണഹൃദയത്തോടെ വിശ്വസിച്ച മാർത്തയോടും മറിയത്തോടും ഇത് വ്യത്യാസപ്പെട്ടിരിക്കുന്നു. തങ്ങളുടെ സഹോദരന്റെ മരണത്തിൽ ദുഃഖിതരാണെങ്കിലും അവർ പറഞ്ഞു, "യേശുവേ,  നീ ഇവിടെ ഉണ്ടായിരുന്നു എങ്കിൽ എന്റെ സഹോദരൻ മരിക്കയില്ലായിരുന്നു. ഇപ്പോഴും നീ ദൈവത്തോടു എന്തു അപേക്ഷിച്ചാലും ദൈവം നിനക്കു തരും എന്നു ഞാൻ അറിയുന്നു." യേശു അവരെ ആശ്വസിപ്പിച്ചുകൊണ്ട് "നിന്റെ സഹോദരൻ ഉയിർത്തെഴുന്നേൽക്കും"എന്നു പറഞ്ഞു. പിന്നെ അവൻ കല്ലറയുടെ അടുക്കൽ ചെന്നു, ഉച്ചത്തിൽ അധികാരത്തോടെ പറഞ്ഞു: "ലാസരേ, പുറത്തുവരിക!" പിന്നെ സംഭവിച്ചത് അത്ഭുതത്തിൽ കുറഞ്ഞതായിരുന്നില്ല. മരിച്ചവൻ ജീവിതത്തിലേക്ക് തിരികെ വന്നു! വാസ്തവത്തിൽ, ആവശ്യമുള്ള സമയത്ത് മാർത്തയ്ക്കും മറിയത്തിനും യേശു ഒരു അഭയസ്ഥാനവും കോട്ടയുമായിരുന്നു.

മനുഷ്യർ നമ്മുടെ ബാഹ്യരൂപത്തിലേക്ക് നോക്കിയേക്കാം, എന്നാൽ നാം അവനിൽ യഥാർത്ഥത്തിൽ വിശ്വസിക്കുന്നുണ്ടോ എന്ന് കർത്താവ് നമ്മുടെ ഹൃദയത്തിലേക്ക് നോക്കുന്നു. ഇന്ന്, നിങ്ങൾ നിങ്ങളുടെ ഹൃദയം ദൈവത്തിന് സമർപ്പിച്ച്, "കർത്താവായ യേശുവേ, എന്നെ സഹായിക്കണമേ" എന്ന് പറയുമോ? കർത്താവ് ഇപ്പോഴും എപ്പോഴും നിങ്ങളുടെ കോട്ടയും അഭയസ്ഥാനവുമായിരിക്കട്ടെ.

PRAYER:
സ്വർഗ്ഗസ്ഥനായ പിതാവേ, കഷ്ടകാലത്ത് എൻ്റെ സങ്കേതവും കോട്ടയും ആയതിന് അങ്ങേക്ക് നന്ദി. അങ്ങയുടെ ശക്തിയും സംരക്ഷണവും തേടി ഞാൻ ഇന്ന് അങ്ങയുടെ അടുക്കൽ വരുന്നു. അങ്ങയെ കൂടുതൽ ആഴത്തിൽ അറിയാൻ എന്നെ സഹായിക്കേണമേ, അതുവഴി എനിക്ക് അങ്ങയെ പൂർണ്ണമായി വിശ്വസിക്കാൻ കഴിയും. കർത്താവേ, എന്റെ ഹൃദയത്തിലേക്ക് നോക്കേണമേ, എല്ലാ സംശയങ്ങളിൽ നിന്നും ഭയത്തിൽ നിന്നും എന്നെ ശുദ്ധീകരിക്കേണമേ. അങ്ങ് ദാവീദിനെ ഉപദ്രവത്തിൽ നിന്ന്  സംരക്ഷിച്ചതുപോലെ, അങ്ങ് എന്റെ പ്രതിരോധമായിരിക്കണമെന്ന് ഞാൻ പ്രാർത്ഥിക്കുന്നു. ജീവിതം വെല്ലുവിളികൾ നിറഞ്ഞതാണെങ്കിൽപ്പോലും അങ്ങയോട് പറ്റിനിൽക്കാൻ എന്നെ പഠിപ്പിക്കേണമേ. അങ്ങയുടെ സാന്നിധ്യം എൻ്റെ അസ്വസ്ഥമായ ഹൃദയത്തിന് സമാധാനവും സന്തോഷവും നൽകട്ടെ. അങ്ങ് എന്നെ കൈവിടുകയില്ല എന്നറിഞ്ഞുകൊണ്ട് ഞാൻ എപ്പോഴും അങ്ങയെ അന്വേഷിക്കട്ടെ. എന്നെ വിശ്വാസത്താൽ നിറയ്ക്കുകയും അങ്ങയെ മഹത്വപ്പെടുത്തുന്ന ഒരു ജീവിതം നയിക്കാൻ എന്നെ നയിക്കുകയും ചെയ്യേണമേ. യേശുവിൻ്റെ നാമത്തിൽ, ഞാൻ പ്രാർത്ഥിക്കുന്നു. ആമേൻ.