എൻ്റെ വിലയേറിയ ദൈവപൈതലേ, നിങ്ങളെ ഏറ്റവും മനോഹരമായി അനുഗ്രഹിക്കാൻ തയ്യാറായിരിക്കുന്ന നമ്മുടെ കർത്താവിനെക്കുറിച്ചുള്ള ദൈവവചനം നിങ്ങളുമായി പങ്കിടുന്നതിൽ എനിക്ക് അതിയായ സന്തോഷം നൽകുന്നു. ഇന്ന്, അവൻ നിങ്ങളെ പുതിയതും അത്ഭുതകരവുമായ രീതിയിൽ അനുഗ്രഹിക്കാൻ പോകുന്നു. യോഹന്നാൻ 14:26 പ്രഖ്യാപിക്കുന്നതുപോലെ: “എങ്കിലും പിതാവു എന്റെ നാമത്തിൽ അയപ്പാനുള്ള പരിശുദ്ധാത്മാവു എന്ന കാര്യസ്ഥൻ നിങ്ങൾക്കു സകലവും ഉപദേശിച്ചുതരികയും ഞാൻ നിങ്ങളോടു പറഞ്ഞതു ഒക്കെയും നിങ്ങളെ ഓർമ്മപ്പെടുത്തുകയും ചെയ്യും.”  

എൻ്റെ സുഹൃത്തേ, ഇന്ന് നിങ്ങൾക്ക് മഹത്തായതും അതിശയകരവുമായ ഒരു അനുഗ്രഹം ലഭിക്കാൻ പോകുകയാണ്. ലൂക്കൊസ് 11:13-ൽ എഴുതിയിരിക്കുന്നതുപോലെ, "അങ്ങനെ ദോഷികളായ നിങ്ങൾ നിങ്ങളുടെ മക്കൾക്കു നല്ല ദാനങ്ങളെ കൊടുപ്പാൻ അറിയുന്നു എങ്കിൽ സ്വർഗ്ഗസ്ഥനായ പിതാവു തന്നോടു യാചിക്കുന്നവർക്കു പരിശുദ്ധാത്മാവിനെ എത്ര അധികം കൊടുക്കും." ഈ വാഗ്‌ദത്തമനുസരിച്ച്, നിങ്ങളെ പരിശുദ്ധാത്മാവിനാൽ അനുഗ്രഹിക്കാൻ കർത്താവ് തയ്യാറാണ്. ആരാണ് പരിശുദ്ധാത്മാവ്? II കൊരിന്ത്യർ 3:17 വെളിപ്പെടുത്തുന്നു, "കർത്താവു ആത്മാവാകുന്നു." പരിശുദ്ധാത്മാവിൻ്റെ രൂപത്തിൽ, കർത്താവ് തന്നെ നിങ്ങളുടെ ജീവിതത്തിലേക്ക് പ്രവേശിക്കുകയും അവൻ്റെ മഹത്വത്തിനായി നിങ്ങളെ പ്രകാശിപ്പിക്കുകയും ചെയ്യും. യെശയ്യാവ് 44:3-ൽ കർത്താവ് നമുക്ക് ഇപ്രകാരം ഉറപ്പുനൽകുന്നു, "ദാഹിച്ചിരിക്കുന്നെടത്തു ഞാൻ വെള്ളവും വരണ്ട നിലത്തു നീരൊഴുക്കുകളും പകരും; നിന്റെ സന്തതിമേൽ എന്റെ ആത്മാവിനെയും നിന്റെ സന്താനത്തിന്മേൽ എന്റെ അനുഗ്രഹത്തെയും പകരും."

എൻ്റെ സ്വന്തം  ജീവിതത്തിൽ നിന്നുള്ള ഒരു സാക്ഷ്യം ഞാൻ പങ്കുവെക്കട്ടെ. 1962-ൽ എൻ്റെ ഭർത്താവ് പരിശുദ്ധാത്മാവിൻ്റെ സ്നാനം ഏറ്റു. തൻ്റെ അസാധാരണമായ അനുഭവങ്ങളെല്ലാം അദ്ദേഹം എന്നോട് പങ്കുവെക്കുമായിരുന്നു. ആ സമയത്ത്, ഒരുപാട് കഷ്ടപ്പാടുകൾക്ക് ശേഷം, പോൾ ദിനകരൻ എന്ന സുന്ദരനായ ഒരു ആൺകുട്ടിയെ ദൈവം ഞങ്ങൾക്ക് നൽകി അനുഗ്രഹിച്ചു. ഈ മഹത്തായ അനുഗ്രഹം ഉണ്ടായിരുന്നിട്ടും, ഞങ്ങളുടെ ഹൃദയങ്ങൾ കൂടുതൽ ദൈവത്തിനായി കൊതിച്ചു. പരിശുദ്ധാത്മാവിനായുള്ള അഗാധമായ ദാഹം എൻ്റെ ഹൃദയത്തിൽ നിറഞ്ഞു. ഞാൻ എൻ്റെ ഭർത്താവിനോട് എണ്ണമറ്റ ചോദ്യങ്ങൾ ചോദിക്കുമായിരുന്നു: "എനിക്ക് എങ്ങനെ പരിശുദ്ധാത്മാവിനെ ലഭിക്കും?" ഞങ്ങളുടെ പൈതൽ നിമിത്തം അമ്മയോടൊപ്പം താമസിക്കുമ്പോൾ ഞാൻ പൂർണ്ണഹൃദയത്തോടെ കർത്താവിനെ അന്വേഷിക്കാൻ തുടങ്ങി. രാത്രികളിൽ, ഞാൻ അവനോട് നിലവിളിച്ചുകൊണ്ട് പ്രാർത്ഥനയിൽ മുട്ടുകുത്തി. എല്ലാ ദിവസവും, "ഒന്നുകിൽ എനിക്ക് പരിശുദ്ധാത്മാവിനെ നൽകുക അല്ലെങ്കിൽ എന്നെ മരിക്കാൻ അനുവദിക്കുക" എന്ന് ഞാൻ ദൈവത്തോട് അപേക്ഷിച്ചു. കർത്താവ് തൻ്റെ വലിയ കാരുണ്യത്താൽ എൻ്റെ നിലവിളി കേട്ട് പരിശുദ്ധാത്മാവിനാൽ എന്നെ സ്നാനപ്പെടുത്തി. അതേ അനുഗ്രഹം ഇന്ന് നിങ്ങൾക്കായി കാത്തിരിക്കുന്നു. ദൈവത്തിന്റെ വചനം പറയുന്നു: "യാചിപ്പിൻ എന്നാൽ നിങ്ങൾക്കു കിട്ടും." ഞാൻ കർത്താവിനോട് യാചിച്ചു, അവൻ എനിക്ക് ഉത്തരം നൽകി. ഇന്നും, 86-ാം വയസ്സിലും, പരിശുദ്ധാത്മാവിൻ്റെ ശക്തിയെ നിലനിറുത്തിക്കൊണ്ട് ഞാൻ അവനെ സേവിക്കുന്നു. അതുപോലെ, നിങ്ങളുടെ പ്രായം പരിഗണിക്കാതെ, നിങ്ങൾക്കും പരിശുദ്ധാത്മാവിനോട് അപേക്ഷിക്കാം. ഇപ്പോൾ തന്നെ നിങ്ങൾക്ക് ഈ വിലയേറിയ ദാനം സ്വീകരിക്കാൻ കഴിയും. ഈ അനുഗ്രഹം ലഭിക്കുമെന്ന വിശ്വാസം നിങ്ങൾക്കുണ്ടോ? യാചിക്കുക, അവൻ്റെ മഹത്തായ ശക്തിയാൽ രൂപാന്തരപ്പെടാൻ തയ്യാറാകുക!

PRAYER:
വിലയേറിയ സ്വർഗ്ഗീയ പിതാവേ, വാഞ്ഛ നിറഞ്ഞ ഹൃദയത്തോടെ ഞാൻ അങ്ങയുടെ സന്നിധിയിൽ വരുന്നു. യാചിക്കുന്ന എല്ലാവരുടെയും മേൽ പരിശുദ്ധാത്മാവിനെ പകരുമെന്ന അങ്ങയുടെ വാഗ്‌ദത്തത്തിന് നന്ദി. കർത്താവേ, ഇന്ന് ഈ വിലയേറിയ ദാനം സ്വീകരിക്കാൻ ഞാൻ എൻ്റെ ഹൃദയം തുറക്കുന്നു. അങ്ങയുടെ ആത്മാവിനാൽ എന്നെ നിറയ്ക്കണമേ, അങ്ങയുടെ സത്യത്തിൽ എന്നെ നയിക്കേണമേ. എല്ലാ കാര്യങ്ങളും എന്നെ പഠിപ്പിക്കുകയും  അങ്ങയുടെ വിശുദ്ധ വചനങ്ങൾ എന്നെ ഓർമ്മിപ്പിക്കുകയും ചെയ്യേണമേ. എൻ്റെ ആത്മീയ ദാഹം ശമിപ്പിക്കുകയും എൻ്റെ ജീവിതത്തെ അങ്ങയുടെ മഹത്വത്തിനുള്ള പാത്രമാക്കുകയും ചെയ്യണമേ. അങ്ങയുടെ സാന്നിധ്യവും ശക്തിയും കൊണ്ട് എന്നെയും എൻ്റെ കുടുംബത്തെയും അനുഗ്രഹിക്കണമേ. അങ്ങ് എൻ്റെ ജീവിതത്തെ രൂപാന്തരപ്പെടുത്തുമെന്ന് അറിഞ്ഞുകൊണ്ട് വിശ്വാസത്തിൽ നടക്കാൻ എന്നെ സഹായിക്കേണമേ. കർത്താവേ, അങ്ങയുടെ എല്ലാ സ്നേഹത്തിനും, കൃപയ്ക്കും, ഏറ്റവും പ്രധാനമായി, അങ്ങയുടെ പരിശുദ്ധാത്മാവിൻ്റെ അമൂല്യമായ ദാനത്തിനും അങ്ങേക്ക് നന്ദി.യേശുവിൻ്റെ നാമത്തിൽ, ഞാൻ പ്രാർത്ഥിക്കുന്നു. ആമേൻ.