എൻ്റെ സുഹൃത്തേ, കർത്താവ് നിങ്ങളുടെ സംരക്ഷണമായിരിക്കും. ഇന്നത്തെ വാഗ്ദത്തം സങ്കീർത്തനം 91:4-ൽ നിന്നാണ്, “തന്റെ തൂവലുകൾകൊണ്ടു അവൻ നിന്നെ മറെക്കും; അവന്റെ ചിറകിൻ കീഴിൽ നീ ശരണം പ്രാപിക്കും.” സർവ്വശക്തനായ ദൈവത്തിൻ്റെ ചിറകുകൾ നിങ്ങളുടെ സങ്കേതമാണ്. പക്ഷികൾ യെരൂശലേമിനു മീതെ  പറക്കുന്നതുപോലെ, സംരക്ഷിക്കാൻ ചിറകുകൾ വിരിച്ചുകൊണ്ട് കർത്താവ് ഇപ്രകാരം പ്രഖ്യാപിക്കുന്നു, "ഞാൻ നിന്നെ സംരക്ഷിക്കും, നിന്റെ മീതെ പറക്കും. ഞാൻ നിന്റെ പരിചയായിരിക്കും. നിന്റെ ആത്മാവ്, നിന്റെ സാമ്പത്തികം, നിന്റെ  കുടുംബജീവിതം, നിന്റെ പ്രശസ്തി, ഞാൻ നിനക്ക് നൽകിയ - നിന്റെ വിദ്യാഭ്യാസം, നിന്റെ ജോലി, നിന്റെ ബിസിനസ്സ്, നിന്റെ ശുശ്രൂഷ, നിന്റെ ബന്ധങ്ങൾ എന്നിവയെയും ഞാൻ കാത്തുസൂക്ഷിക്കും. ഞാൻ അതെല്ലാം സംരക്ഷിക്കും. നീ എൻ്റെ യെരൂശലേമാണ്. ഞാൻ നിന്നിൽ വസിക്കുന്നു, ഞാൻ നിന്നോടൊപ്പം ജീവിക്കുന്നു. ഞാൻ നിന്നെ കാക്കും.”

കൂടാതെ, അവൻ നമുക്ക് ഉറപ്പുനൽകുന്നു, “ഒരു കഴുകൻ തന്റെ ചിറകു വിരിച്ചു കുഞ്ഞുങ്ങളെ വഹിക്കുന്നതുപോലെ, ഞാനും നിങ്ങളെ വഹിക്കും.” അതെ, തിന്മ വരുമ്പോൾ, പ്രലോഭനങ്ങൾ ഉണ്ടാകുമ്പോൾ, ശത്രു നിങ്ങളുടെ നേരെ വരുമ്പോൾ, കർത്താവ് ഇങ്ങനെ വാഗ്ദാനം ചെയ്യുന്നു, "ഞാൻ നിന്നെ ആത്മാവിൽ ഉയർത്തും. ഞാൻ നിന്നെ എൻ്റെ ചിറകുകളിൽ വഹിക്കും, നിന്നെ ഉയർന്ന സ്ഥലങ്ങളിലേക്ക് കൊണ്ടുപോകും. പരിശുദ്ധാത്മാവിനാൽ അഭിഷേകം ചെയ്ത്, നിന്നെ ജഡത്തിൽ നിന്ന് ആത്മീയ മണ്ഡലത്തിലേക്ക് പരിവർത്തനം ചെയ്തുകൊണ്ട് എന്നോടൊപ്പം നടക്കാൻ ഞാൻ നിന്നെ സഹായിക്കും." അവനുമായുള്ള നിങ്ങളുടെ ആത്മീയ യാത്രയിൽ കർത്താവ് നിങ്ങളെ കൂടുതൽ ഉയരങ്ങളിലേക്ക് ഉയർത്തും. എല്ലാ മാനുഷിക ആക്രമണങ്ങൾക്കും പൈശാചിക അടിച്ചമർത്തലുകൾക്കും മുകളിൽ നിങ്ങൾ ഉയരുമ്പോൾ അവൻ്റെ സാന്നിധ്യം നിങ്ങൾക്ക് അനുഭവപ്പെടും. തന്നെ കാത്തിരിക്കുന്നവരോട്, "അവർ തങ്ങളുടെ ശക്തി പുതുക്കുകയും കഴുകന്മാരെപ്പോലെ ചിറകു അടിച്ചു കയറുകയും ചെയ്യും" എന്ന് വാഗ്ദാനം ചെയ്തതുപോലെ അവൻ നിങ്ങൾക്ക് ശക്തി നൽകും. നിങ്ങൾ ദീർഘകാലമായി കാത്തിരിക്കുന്ന  വലിയ അനുഗ്രഹങ്ങളിലേക്ക് നിങ്ങളെ ഉയർത്താൻ ദൈവം തയ്യാറെടുക്കുകയാണ്. ഇന്ന്, യേശുവിന്റെ നാമത്തിൽ നിങ്ങളുടെ ജീവിതത്തിൽ ഞാൻ ഈ അനുഗ്രഹങ്ങൾ പ്രഖ്യാപിക്കുന്നു. നിങ്ങളുടെ അനുഗ്രഹങ്ങളെ തടസ്സപ്പെടുത്തിയ ഓരോ അടഞ്ഞ വാതിലും യേശുവിന്റെ നാമത്തിൽ തുറക്കാൻ ഞാൻ കൽപ്പിക്കുന്നു. അവന്റെ ആത്മാവിന്റെ ശക്തിയാൽ നിങ്ങൾ ജീവിതത്തിൽ ഉയർന്ന സ്ഥാനങ്ങളിലേക്ക് ഉയരട്ടെ, യേശുവിൻ്റെ നാമത്തിൽ.

ഒരു അത്ഭുതകരമായ സാക്ഷ്യം ഞാൻ പങ്കുവയ്ക്കട്ടെ. വനംവകുപ്പിൽ ജോലി ചെയ്യുന്ന ദിഗംബർ തിർക്കിയെയാണ് നിരഞ്ജനി കുജൂർ വിവാഹം കഴിച്ചത്. വിവാഹശേഷം നിരഞ്ജനിക്ക് നിരവധി ആരോഗ്യപ്രശ്നങ്ങൾ നേരിടേണ്ടി വന്നിരുന്നു. വൈദ്യശ്രമങ്ങൾ നടത്തിയിട്ടും രോഗശമനം ഉണ്ടായില്ല. അഞ്ചുവർഷക്കാലം, കുട്ടികളില്ലാത്തതിൻ്റെ വേദനയും, അതുണ്ടാക്കിയ നാണക്കേടും സങ്കടവും അവർ സഹിച്ചു. അവർ ദൈവത്തിൻ്റെ ഇടപെടൽ തേടി ഡൽഹിയിൽ നടന്ന യേശു വിളിക്കുന്നു പ്രവാചക സമ്മേളനത്തിൽ പങ്കെടുത്തു. അവരുടെ കണ്ണുനീർ കണ്ട് ഞാൻ അവരുടെ മേൽ കൈവെച്ച് ഒരു കുഞ്ഞിന് വേണ്ടി പ്രാർത്ഥിച്ചു. അവരുടെ ഹൃദയത്തിൽ സമാധാനം നിറഞ്ഞു, അവർ വീട്ടിലേക്ക് മടങ്ങി. അവളുടെ ആരോഗ്യത്തിൽ വലിയ മാറ്റങ്ങൾ വന്നു, അതേ വർഷം തന്നെ നിരഞ്ജനി ഗർഭം ധരിച്ചു. അവൾ സുന്ദരിയായ ഒരു പെൺകുഞ്ഞിന് ജന്മം നൽകി, കർത്താവിൽ നിന്നുള്ള സന്തോഷത്തിൻ്റെ ദാനം! ദൈവം, സഹോദരി. നിരഞ്ജനിക്ക് വേണ്ടി ചെയ്തത്, നിങ്ങൾക്കും ചെയ്യാൻ അവന് കഴിയും. അവൻ നിങ്ങളെ അവൻ്റെ തൂവലുകൾ കൊണ്ട് മറെക്കും, അവൻ്റെ ചിറകിൻ കീഴിൽ നിങ്ങൾ ശരണം പ്രാപിക്കും.

PRAYER:
സ്വർഗ്ഗീയ പിതാവേ, അങ്ങയുടെ തൂവലുകളാൽ എന്നെ മറെക്കുകയും അങ്ങയുടെ ശക്തിയേറിയ ചിറകുകൾക്ക് കീഴിൽ എനിക്ക് അഭയം നൽകുകയും ചെയ്തുകൊണ്ട് എന്റെ സങ്കേതവും സംരക്ഷകനുമായിരിക്കുന്നതിന് അങ്ങേയ്ക്ക് നന്ദി. എൻ്റെ ആത്മാവിനെയും, എൻ്റെ കുടുംബത്തെയും, എൻ്റെ ജോലിയെയും, അങ്ങ് എനിക്ക് നൽകിയ എല്ലാ അനുഗ്രഹങ്ങളെയും കാത്തുകൊള്ളണമേ. കർത്താവേ, ശത്രുവിൻ്റെ എല്ലാ പരീക്ഷണങ്ങൾക്കും പ്രലോഭനങ്ങൾക്കും ആക്രമണങ്ങൾക്കും മുകളിൽ എന്നെ ഉയർത്തി അങ്ങയുടെ ചിറകുകളിൽ എന്നെ വഹിക്കേണമേ. അങ്ങയുടെ പരിശുദ്ധാത്മാവിനാൽ എന്നെ അഭിഷേകം ചെയ്യുകയും അങ്ങയോടൊപ്പം ആഴത്തിലുള്ള ആത്മീയയാത്രയിലേക്ക് എന്നെ നയിക്കുകയും ചെയ്യണമേ. അടഞ്ഞുകിടക്കുന്ന എല്ലാ വാതിലുകളും തുറക്കുമെന്നും, അങ്ങയുടെ തക്ക സമയത്ത് ഞാൻ കാത്തിരിക്കുന്ന അനുഗ്രഹങ്ങൾ പ്രകാശനം ചെയ്യുമെന്നും ഞാൻ വിശ്വസിക്കുന്നു. അങ്ങയുടെ സാന്നിധ്യം എൻ്റെ ജീവിതത്തിൽ നിറയുകയും വിജയത്തിലും സമാധാനത്തിലും ജീവിക്കാൻ എന്നെ ശക്തനാക്കുകയും ചെയ്യട്ടെ. യേശുവിൻ്റെ നാമത്തിൽ, ഞാൻ പ്രാർത്ഥിക്കുന്നു, ആമേൻ.