എൻ്റെ വിലയേറിയ ദൈവപൈതലേ, നമ്മുടെ കർത്താവും രക്ഷകനുമായ യേശുക്രിസ്തുവിൻ്റെ മഹത്തായ നാമത്തിൽ ഞാൻ നിങ്ങൾക്ക് വന്ദനം പറയുന്നു. ഇന്ന്, നമുക്ക് I യോഹന്നാൻ 4:4-ൽ നിന്നുള്ള മനോഹരമായ ഒരു വാഗ്‌ദത്തത്തെക്കുറിച്ച് ധ്യാനിക്കാം. അത് ഇപ്രകാരം പറയുന്നു, “നിങ്ങളിലുള്ളവൻ ലോകത്തിൽ ഉള്ളവനെക്കാൾ വലിയവനല്ലോ.”

നമ്മുടെ ദൈവം യഥാർത്ഥത്തിൽ വലിയ ദൈവമാണ്. നിങ്ങൾക്ക് പ്രശ്‌നങ്ങൾ നേരിടേണ്ടിവരുമ്പോൾ പോലും, ലോകത്തേക്കോ, ലോകത്തിലെ സുഹൃത്തുക്കളിലേക്കോ, അല്ലെങ്കിൽ നിങ്ങളുടെ പിതാവിലേക്കോ മാതാവിലേക്കോ പോലും നോക്കരുത്. പകരം, സർവ്വശക്തനായ ദൈവത്തിങ്കലേക്ക് നോക്കുക. ഓർക്കുക, ഞാൻ പലപ്പോഴും പറയുന്നതുപോലെ, "നിങ്ങളുടെ ദൈവം വലിയ ദൈവമാണ്!" അവൻ നിങ്ങൾക്കായി അത്ഭുതങ്ങൾ പ്രവർത്തിക്കും; അവൻ ഒരു അത്ഭുതം പ്രവർത്തിക്കുന്ന ദൈവമാണ്. അവൻ്റെ പേര് തന്നെ അത്ഭുതം എന്നാണ്. ഹല്ലേലൂയാ! എൻ്റെ പ്രിയപ്പെട്ടവരേ, എന്തൊരു മഹത്തായ ദൈവം നിങ്ങൾക്കുണ്ട്. സങ്കീർത്തനം 96:4-ൽ പറയുന്നതുപോലെ, "യഹോവ വലിയവനും ഏറ്റവും സ്തുത്യനും ആകുന്നു," അതുപോലെ സങ്കീർത്തനം 104:1, സങ്കീർത്തനം 147:5 എന്നിവയിൽ: "നമ്മുടെ കർത്താവു വലിയവനും ശക്തിയേറിയവനും ആകുന്നു" എന്ന് പറയുന്നു.

ദാവീദിന് പല വെല്ലുവിളികളും നേരിട്ടു, എന്നിട്ടും അവൻ എപ്പോഴും കർത്താവിങ്കലേക്ക് നോക്കുന്ന ഒരു ദൈവപുരുഷനായിരുന്നു, "അങ്ങ് എൻ്റെ പ്രത്യാശയാകുന്നു. അങ്ങ് എൻ്റെ സന്തോഷം ആകുന്നു. അങ്ങ് എൻ്റെ ബലമാകുന്നു." "അങ്ങാണ് എൻ്റെ എല്ലാം" എന്ന് അവൻ വീണ്ടും വീണ്ടും പറയുമായിരുന്നു. എൻ്റെ പ്രിയ ദൈവപൈതലേ, നിങ്ങളും ഇതുതന്നെ പ്രഖ്യാപിക്കുക- “കർത്താവാണ് എൻ്റെ ഏക പ്രത്യാശ. ഞാൻ എല്ലായ്‌പ്പോഴും അവനെ നോക്കും.” നിങ്ങൾ അങ്ങനെ ചെയ്യുമ്പോൾ, നിങ്ങളുടെ ജീവിതത്തിലും കർത്താവ് വലിയ ദൈവമായി മാറും. സങ്കീർത്തനം 111:2-3 പറയുന്നു, " യഹോവയുടെ പ്രവൃത്തികൾ വലിയവ ആകുന്നു. അവന്റെ പ്രവൃത്തി മഹത്വവും തേജസ്സും ഉള്ളതു." ദാവീദ് ദൈവത്തിൽ പൂർണമായി വിശ്വസിച്ചു, അവൻ വലിയ കാര്യങ്ങൾ ചെയ്യുമെന്നും വിശ്വസിച്ചു.

അതുപോലെ, നിങ്ങളും ഒരുപക്ഷെ കുഴപ്പത്തിലോ ആവശ്യത്തിലോ ആയിരിക്കാം. ഒരു പുരുഷനെയോ സ്ത്രീയെയോ നോക്കുകയോ മറ്റാരുടെയെങ്കിലും സഹായം തേടുകയോ ചെയ്യരുത്. പകരം, സർവ്വശക്തനായ ദൈവത്തിങ്കലേക്ക് നോക്കുക. അവനോട് നിലവിളിക്കുക, നിങ്ങളുടെ എല്ലാ ആവശ്യങ്ങളും പങ്കിടുക, നിങ്ങളുടെ നിലവിളി അവൻ കേൾക്കുന്നുവെന്ന് വിശ്വസിക്കുക. ഇപ്പോൾ തന്നെ, അവൻ നിങ്ങൾക്കായി വലിയ കാര്യങ്ങൾ ചെയ്യും. നിങ്ങൾ അത് വിശ്വസിക്കുന്നുണ്ടോ? നിങ്ങളെ എല്ലാ പ്രശ്‌നങ്ങളിൽ നിന്നും കരകയറ്റാൻ കർത്താവിന് കഴിയും. നിങ്ങളുടെ എല്ലാ കഷ്ടപ്പാടുകളും അവനിൽ ഭരമേൽപ്പിക്കുകയും ദാവീദിനെപ്പോലെ വിശ്വസിക്കുകയും ചെയ്യുക. കർത്താവ് ഇപ്പോൾതന്നെ നിങ്ങളുടെ ജീവിതത്തിൽ വലിയ കാര്യങ്ങൾ ചെയ്യും. നിങ്ങൾ വിശ്വസിക്കുന്നുവെങ്കിൽ, നിങ്ങൾ ദൈവത്തിൻ്റെ മഹത്വം കാണും. ഇന്ന് അവൻ്റെ ഏറ്റവും വലിയ അനുഗ്രഹങ്ങൾ സ്വീകരിക്കുക, കാരണം അവൻ്റെ മഹത്വം മാറ്റമില്ലാത്തതാണ്. ഹല്ലേലൂയാ!

PRAYER:
പ്രിയ കർത്താവേ, എൻ്റെ മഹാനും ശക്തനുമായ രക്ഷിതാവേ, എല്ലാവരേക്കാളും വലിയവനേ, എൻ്റെ ഏക പ്രതീക്ഷയും ശക്തിയുമായവനേ ഞാൻ അങ്ങയുടെ അടുക്കൽ വരുന്നു. എൻ്റെ സർവ്വശക്തനായ ദൈവമേ, കഷ്ടകാലങ്ങളിൽ, ഞാൻ അങ്ങിലേക്ക് മാത്രം നോക്കുന്നു, കാരണം അങ്ങ് മാത്രമാണ് എൻ്റെ അഭയവും എൻ്റെ സന്തോഷവും എൻ്റെ സമാധാനവും. കർത്താവേ, അങ്ങ് എൻ്റെ ജീവിതത്തിൽ അത്ഭുതങ്ങൾ പ്രവർത്തിക്കുകയും അങ്ങയുടെ അത്ഭുതങ്ങൾ കാണിക്കുകയും ചെയ്യട്ടെ എന്ന് ഞാൻ പ്രാർത്ഥിക്കുന്നു. അങ്ങയുടെ ശാശ്വതമായ ശക്തിയിൽ ആശ്രയിച്ചുകൊണ്ട് എൻ്റെ എല്ലാ ആവശ്യങ്ങളും ഞാൻ അങ്ങയുടെ മുമ്പിൽ വെക്കുന്നു. എൻ്റെ അത്ഭുതം പ്രവർത്തിക്കുന്ന ദൈവമേ, എല്ലാ അനുഗ്രഹങ്ങളുടെയും ഉറവിടം അങ്ങാണ്. ഞാൻ അങ്ങിൽ വിശ്വസിക്കുമ്പോൾ അങ്ങയുടെ മഹത്വം എന്നിൽ പ്രകാശിക്കട്ടെ. കർത്താവേ, എൻ്റെ ഹൃദയത്തിൻ്റെ അഗാധമായ നിലവിളി കേട്ടതിന് അങ്ങേക്ക് നന്ദി. അങ്ങയുടെ മഹത്വത്തിലും ശക്തിയിലും ഞാൻ വിശ്വസിക്കുന്നു. യേശുവിൻ്റെ നാമത്തിൽ, ഞാൻ പ്രാർത്ഥിക്കുന്നു, ആമേൻ.